Feneyjanefnd gagnrýnir breytingar á stjórnarskrá Azerbaijan

by Herdís Þorgeirsdóttir | 21.09.2016 | PISTLAR & FRÉTTIR

Feneyjanefnd í bráðabirgðaáliti, sem sagt er frá á forsíðu Evrópuráðsins í dag – gagnrýnir fyrirhugaðar breytingar á stjórnarskrá Azerbaijan sem bornar verða undir þjóðaratkvæði 26. september n.k.

 Breytingarnar munu hafa mikil áhrif á valddreifingu í Azerbaijan þar sem þær færa forseta landsins aukin og fordæmalaus völd. Kjörtímabil hans verður lengt úr fimm í sjö ár. Engin takmörk eru fyrir því hvað hann getur setið mörg kjörtímabil en forsetinn er þegar mjög valdamikill.

Önnur breyting gerir ráð fyrir að forsetinn geti leyst þingið upp sem lamar í raun stjórnarandstöðuna. Breytingarnar munu bitna  á sjálfstæði dómstóla þar sem dregið verður úr hlutverki þingsins í að samþykkja skipanir dómara.

Þá gera fyrirhugaðar breytingar ráð fyrir skipunum varaforseta án undangengins kjörs sem geta tekið við stjórn landsins ef svo ber undir auk þess sem forsetinn getur boðað til kosninga þegar honum sýnist.

Í áliti Feneyjanefndar er aðdragandi þjóðaratkvæðis gagnrýndur þar sem engar alvöru umræður hafi farið fram um fyrirhugaðar breytingar á stjórnskipun landsins; fyrirvarinn sé allt of skammur og skort hafi á almenna umræðu.

Álit á lögum í Rússlandi sem hefta félagafrelsi

by Herdís Þorgeirsdóttir | 5.09.2016 | PISTLAR & FRÉTTIR

Hér má sjá álit Feneyjanefndar, Nefndar Evrópuráðsins um lýðræði með lögum, sem ég vann ásamt tveimur öðrum og var samþykkt á síðasta aðalfundi nefndarinnar í júní sl. en það varðar breytingar á lögum í Rússlandi um “óæskilega” starfsemi erlendra og alþjóðlegra félagasamtaka í landinu. Sjá hér.

Aldursfordómar eitt megin viðfangsefni feminismans

by Herdís Þorgeirsdóttir | 9.07.2016 | PISTLAR & FRÉTTIR

Isabella Rosselini var rekin frá Lancome 43 ára af því andlit hennar var ekki lengur tákn draumsins um eilífa æsku heldur áminning til kvenna um þann meinta ömurlega veruleika sem beið þeirra við að eldast. Nú hefur hún verið ráðin aftur sem andlit Lancome þar sem karlar eru ekki lengur ráðandi í forystu. Aldursfordómar ættu að vera á undanhaldi. Isabella talar í meðfylgjandi viðtali um að hrós til kvenna um að þær séu “enn þá” fallegar komnar yfir sextugt sé tvíeggjað sverð; þ.e. að þær líti enn vel út þrátt fyrir aldurinn; sem og að tala um að konur séu unglegar. Slétt og felld fegurð kann að tengjast æskunni en glæsileiki, persónutöfrar og margt annað er ótengt aldri.

Glæsilegasta landkynning sem Ísland hefur fengið

by Herdís Þorgeirsdóttir | 4.07.2016 | PISTLAR & FRÉTTIR

Íslensku strákarnir stórkostlegir. Glæsilegasta landkynning sem Ísland hefur fengið! Þeir áunnu sér aðdáun og virðingu umheimsins. Franska liðið þakkaði þeim drengilega baráttu eftir leikinn í gær. Undir handleiðslu Lars Lagerbäck og Heimis Hallgrímssonar sýndu þeir að vilji er allt sem þarf og góð skipulagning. Þeir sýndu karakter í leiknum, voru aldrei með óhemjugang eða prímadonnustæla; en börðust af ástríðu við lið sem hafa “glóbal” fjármagn á bak við sig. Og þeir voru aldrei flottari en þegar þeir tóku á móti hyllingu tryggu íslensku áhorfendanna eftir að hafa tapað orustunni við Frakka – í mínum huga unnu þeir stríðið!

Að hafa átt samtal við þjóðina

by Herdís Þorgeirsdóttir | 20.03.2016 | PISTLAR & FRÉTTIR

Fjöldi fólks hefur nú boðið sig fram til að gegna embætti forseta Íslands. Ekki sér fyrir endan á framboðum.  Forseti Íslands er þjóðhöfðingi, æðsti embættismaður ríkisins og kemur fram fyrir hönd lands og þjóðar á alþjóðavettvangi. Burtséð frá því hvort fólki finnst þetta embætti tímaskekkja eða hvaða breytingar megi hugsanlega gera á því, þá er ekki úr vegi að velta fyrir sér hvaða kröfur eigi að gera til þess sem sækist eftir því að verða forseti Íslands.

1. Forseti Íslands þarf að hafa gott vald á íslenskri tungu; þekkja menningararfinn og söguna.
2. Forseti Íslands þarf að kunna skil á stjórnskipun landsins og hafa skarpa sýn á hugmyndafræðileg ágreiningsmál í samfélaginu.
3. Forseti Íslands þarf að hafa gert sig gildandi á alþjóðavettvangi og vera vel mæltur á önnur tungumál.
4. Forseti Íslands þarf að vera þekktur af verkum sínum (í ritinu Stjórnskipunarréttur eftir Ólaf Jóhannesson segir að forseti þurfi að vera“hæfileikamaður”).
5. Síðast en ekki síst þarf sá sem sækist eftir þessu embætti að “hafa átt samtal við þjóðina”, lagt eitthvað af mörkum í þjóðfélagsumræðunni, skrifað eða talað fyrir einhverju málefni sem hefur haft áhrif í samfélaginu, jafnvel einnig alþjóðlega.

Því má svo við bæta að auðvitað skiptir öllu máli að þetta æðsta embætti þjóðarinnar skipi heiðarleg, réttsýn og velviljuð manneskja.

Álit Feneyjanefndar á umdeildum ákvæðum tyrkneskra hegningarlaga

by Herdís Þorgeirsdóttir | 16.03.2016 | PISTLAR & FRÉTTIR

Tyrknesk stjórnvöld í Ankara sæta vaxandi gagnrýni í alþjóðasamfélaginu vegna ofsókna á hendur blaðamönnum og andófsmönnum, sem gagnrýna þau. Feneyjanefndin samþykkti á fundi sínum í mars álit á framkvæmd nákvæða tyrknesku hegningarlaganna sem bitna sérstaklega á fjölmiðlum og andófsmönnum. Sjá hér.