by Herdís Þorgeirsdóttir | 29.05.2008 | Almanak
Tengslanet – IV: völd til kvenna
Ráðstefna á Bifröst 29. – 30. maí 2008
”Konur og Réttlæti”
Dagskrá
Fimmtudagurinn 29. maí 2008
Kl. 1630 Mæting á Bifröst og skráning
Kl. 17.30 Upphitun við rætur Grábrókar
Hafdís Jónsdóttir, betur þekkt sem Dísa í World Class, stjórnar upphitun áður en haldið er í göngu á Grábrók. Athugið að vera í hlýjum og þægilegum fatnaði. Það er göngustígur alla leiðina upp. Ekki erfitt!
Kl. 17.45 Blessun í upphafi göngu
Séra Jóna Hrönn Bolladóttirflytur ávarp og blessar hópinn áður en lagt er af stað.
Kl. 18.10 Fjallræðan
Fjallræðuna flytur Steinunn Sigurðardóttir rithöfundur
Kl. 18.40 Rútur flytja gesti niður í Parardísarlaut
Þar verður framreiddur kvöldverður með léttum veigum. Veislustjóri er Guðrún Sesselja Arnardóttir lögmaður. Katrín Jakobsdóttir þingmaður, Steinunn Stefánsdóttir ritstjóri, Þorbjörg S. Gunnlaugsdóttir lögfræðingur og fleiri skemmtilegar konur taka til máls.
Kl. 22.00 Rútur fara með gesti heim á hótel
Hraunsnef, Hótel Hamar, Hótel Borgarnes og Hótel Reykholt, Bjarg, Ensku húsin, Stóru-Skógar og Munaðarnes.
Föstudagurinn 30. maí 2008
Kl. 08.20 Rútur sækja gesti á hótel
Hraunsnef, Hótel Hamar, Hótel Borgarnes, Hótel Reykholt, Bjarg, Ensku húsin, Stóru-Skógar og Munaðarnes.
Kl. 09.00 Ágúst Einarsson rektor á Bifröst býður gesti velkomna
Kl. 09.05 Opnun ráðstefnu– Herdís Þorgeirsdóttir prófessor
Kl. 09.15 Maud de Boer Buquicchio annar framkvæmdastjóri Evrópuráðsins
Maud de Boer Buquicchio flytur erindi. Hún er fyrsta konan til að gegna starfi framkvæmdastjóra Evrópuráðsins, er lögfræðingur að mennt með sérstakan áhuga og þekkingu á jafnréttismálum og mannréttindum almennt.
Kl. 09.45 Fyrirspurnir úr sal
Herdís Þorgeirsdóttirprófessor og HelgaJónsdóttir bæjarstýra í Fjarðabyggð stjórna umræðum
Kl. 10.00 Fremsti fræðimaðurinn 2008
Prófessor Judith Resnik við lagadeild Yale háskóla
Judith Resnik er aðalfyrirlesari Tengslanetsins að þessu sinni. Lögmannafélag Bandaríkjanna heiðraði hana í Los Angeles fyrir skömmu sem athyglisverðasta fræðimanninn á sviði lögfræði nú en aðeins fáar konur hafa hlotið þann heiður í fyrri tilfellum. Hún hefur sem fræðimaður stefnt að því að hafa áhrif á hugmyndir um réttarríkið og réttarframkvæmd: félagslegt réttlæti og femínisma.
Kl. 10.40 Kaffi
Kl. 10.55 Fyrirspurnir til Judith Resnik og umræður í kjölfar erindis hennar
Kl. 11.15 Pallborð I – KVENORKAN Í ATVINNULÍFINU
Stjórn umræðna Ingibjörg Sólrún Gísladóttirutanríkisráðherra. Framsögur hafa Elín Sigfúsdóttir
framkvæmdastjóri hjá Landsbankanum, Kristín Linda Jónsdóttir kúabóndi sem flytur erindið Stelpur í starfi – blómlegri landsbyggð og sælla samfélag, Dögg Pálsdóttir lögmaður flytur erindið Að gera eitthvað úr engu, nema sjálfum sér,Heiðrún Jónsdóttirframkvæmdastjóri hjá Eimskip og Kristín Pétursdóttirforstjóri Auðar
Capital sem segir Förum fyrir fé
Kl. 12.10 Umræður og fyrirspurnir úr sal
Kl. 12.30 Hádegisverður – hlaðborð
Kl. 13.30 Pallborð II – Lífsbaráttan: Foreldrar og fyrirvinnur, fjölskyldur & flækjur
Stjórn umræðna Hanna Birna Kristjánsdóttir forseti borgarstjórnar. Framsögur hafa María Ellingsenleikkona, Arnfríður Einarsdóttirhéraðsdómari, Hildur Sólveig Pétursdóttir hrl. og Guðrún Nordalprófessor.
Kl. 14.30 Pallborð III – Réttlæti og pólitísk rétthugsun
Stjórn umræðna Hjördís Hákonardóttirhæstaréttardómari. Framsögur hafa Margrét S. Björnsdóttir forstöðumaður hjá HÍ, Kristín Marja Baldursdóttir rithöfundur, Ragnhildur Sverrisdóttirrithöfundur og Svanhildur Hólm Valsdóttir ritstjóri Íslands í dag.
Kl. 15.20 Kaffi, konfekt og ávextir
Kl. 15.35 Pallborð IV – Nýjar leikreglur í þágu réttlætis
Stjórnandi umræðna Valgerður Sverrisdóttir fyrrverandi ráðherra. Framsögur hafa Kolbrún Sævarsdóttirsaksóknari, Guðný Halldórsdóttir leikstjóri, Vigdís Grímsdótturrithöfundur og Valgerður Bjarnadóttirviðskiptafræðingur og varaþingmaður.
Kl. 17.00 Ráðstefnuslit
Kl. 18.30 Móttaka Forseta Íslands á Bessastöðum
Boðið verður upp á léttar veitingar.
Frá móttöku á Bessastöðum í lok Tengslanets I – vorið 2004.
by Herdís Þorgeirsdóttir | 29.05.2008 | Almanak
Orðin verða lög
Afl í sjálfu sér
* „Tengslanet stærra en nokkru sinni, “ segir prófessor Herdís Þorgeirsdóttir stofnandi ráðstefnunnar * Vilja rétta hlut kvenna
Eftir Björgu Evu Erlendsdóttur beva@24stundir Ráðstefnan Tengslanet IV – Völd til kvenna hefst í dag með því að tæplega 500 konur ganga á Grábrók, þar á meðal Maud de Boer Buquicchio, annar framkvæmdastjóri Evrópuráðsins, og Judith Resnik, prófessor við…
Eftir Björgu Evu Erlendsdótturbeva@24stundir
Ráðstefnan Tengslanet IV – Völd til kvenna hefst í dag með því að tæplega 500 konur ganga á Grábrók, þar á meðal Maud de Boer Buquicchio, annar framkvæmdastjóri Evrópuráðsins, og Judith Resnik, prófessor við lagadeild Yale. „Resnik var útnefnd fremsti fræðimaður í lögfræði 2008 í Bandaríkjunum, “ segir dr. Herdís Þorgeirsdóttir, stofnandi Tengslanetsins.
Konur sem mæta koma úr öllum áttum og eru af öllum stéttum og á öllum aldri í íslensku samfélagi. „Þær eiga það sameiginlegt að vilja rétta hlut kvenna,“ segir Herdís.
Þegar sú hugmynd hennar kviknaði árið 2004, eftir að Herdís hóf störf við lagadeildina á Bifröst, að efna til ráðstefnu um jafnréttismál grunaði hana ekki að hún yrði stærsta ráðstefnan í íslensku viðskiptalífi. Þátttakan sló met 2006 og er enn meiri nú.
Paradísarlaut of lítil
Steinunn Sigurðardóttir rithöfundur ávarpar konur af Grábrók í dag, standandi hlaðborð er á Kiðáreyrum við Hreðavatn, en ekki í Paradísarlaut eins og hingað til því að lautin rúmar ekki fjöldann.Erlendu gestirnir hefja formlega dagskrá með erindum en þá taka við pallborðsumræður í fjórum liðum, undir stjórn íslenskra kvenna.
Lokapunkturinn verður settur í móttöku hjá Ingibjörgu Sólrúnu Gísladóttur, utanríkisráðherra en fjöldans vegna var ekki hægt að vera á Bessastöðum eins og fyrri ár. Það má því segja að ráðstefnan hafi sprengt af sér bæði Bessastaði og Paradísarlaut.
Eldmóður og samstaða
„Ég var fengin til að tala um réttindi barna hjá félagi kvenna í læknastétt og sá þá að áhugi á jafnréttismálum, réttindum barna og mannréttindum almennt var ekki bundinn við lögfræðinga. Betra væri að sækja þátttakendur víðar enda eru málefnin slík að þau snerta allar konur, hvar í flokki sem þær standa eða hvaða starfi sem þær gegna og því mikilvægt að sem flestar raddir heyrist í þessum efnum. Þá sá ég einnig að náttúrulegt umhverfið hér væri kjörinn vettvangur. Gífurleg stemning myndaðist á fyrstu ráðstefnunni og þeim seinni. Þar er gleði, eldmóður og samstaða og nú víbrar loftið þegar Tengslanet IV er að hefjast. Hópurinn hefur aldrei verið fjölbreyttari og erlendu fyrirlesararnir eru spenntir fyrir þessu fyrirbæri sem mér finnst sjálfri hafa orðið afl í sjálfu sér.“
Árangurinn er augljós
„Já,“ segir Herdís og vísar í ályktanir Tengslanetsins um konur í stjórnir fyrirtækja og um afnám launaleyndar. „Hlutafélagalögum var breytt í kjölfar Tengslanets 2006 og ályktun um afnám launaleyndar var líka lögleidd.“ Hún bætir við að enn vanti mikið upp á að konur njóti sömu kjara og karlar, að raddir þeirra heyrist og þær taki ákvarðanir í efstu lögum samfélagsins – „en við verðum að halda áfram því að jafnréttisbaráttan er samofin almennri velmegun og velferð. Það eru því hagsmunir allra að konur hviki hvergi. Ef við stöndum saman og munum að sameiginlegir hagsmunir eru meiri en það sem skilur okkur að náum við árangri. Samstaða er lykilatriði. Ég las nýlega gott heilræði: leggðu hart að þér, ekki búast við neinu og skemmtu þér! Þetta er það sem við eigum að gera. Það gerir það enginn annar fyrir okkur.“
Í hnotskurn
Fyrsta ályktun Tengslanetsins var um konur í stjórnir, síðast var ályktað um afnám launaleyndar. Ingibjörg Sólrún Gísladóttir hefur sótt ráðstefnuna frá upphafi. Utanríkisráðherra á von á Condoleezzu Rice á morgun.
by Herdís Þorgeirsdóttir | 28.05.2008 | PISTLAR & FRÉTTIR
TENGSLANETS-ráðstefnurnar eru vettvangur til þess að efla samstöðu kvenna og skapa vettvang fyrir frjóar umræður sem skila einhverju út í samfélagið,“ segir dr. Herdís Þorgeirsdóttir, prófessor við lagadeild Háskólans á Bifröst og stjórnandi núorðið stærstu ráðstefnu, sem haldin er í viðskiptalífinu.
Tengslanet IV – völd til kvenna ráðstefnan, sem nú fer fram í fjórða sinn hefst á Bifröst á morgun og stendur fram á föstudag. Hátt í 500 konur sækja ráðstefnuna í ár og er það metþátttaka, en á fyrstu ráðstefnunni, sem fram fór fyrir fjórum árum voru um 160 þátttakendur. Bifröst fagnar 90 ára afmæli sínu í ár og segir Herdís gleðiefni að ráðstefnan sé haldin á afmælisárinu. Hún var síðast haldin 2006 en hafði fram að því verið árviss viðburður. Aukning þátttakenda hefur verið um 60% á ári frá því að hún var fyrst haldin 2004.
En hvers konar ráðstefna er Tengslanetið? Herdís bendir á að sérstaða ráðstefnunnar sé að hún gangi þvert á stétt og stöðu, pólitíska ása og aldur kvenna, en í ár eru konurnar sem taka þátt á aldrinum 20-80 ára. Þverpólitískur andi svífi yfir vötnum á Tengslanetinu. „Þetta kom fram strax á fyrstu ráðstefnunni. Þar sátu í pallborði fyrrverandi andstæðingar í stjórnmálum, þær Ingibjörg Sólrún Gísladóttir og Inga Jóna Þórðardóttir,“ segir hún. Meðal þátttakenda í ár séu lögmenn, dómarar, prófessorar, blaðamenn, tannlæknar, húsmæður, bændur, framkvæmdastjórar, ömmur, námskonur, flugfreyjur, prestar, leikskólakennarar og rithöfundar svo eitthvað sé talið.
Herdís segir að hin góða þátttaka í ráðstefnunni sýni að mikil þörf sé á henni. „Ég held að það sé þörf fyrir að fá fróðleik og alþjóðlega strauma beint í æð,“ segir Herdís og vísar til aðalfyrirlesara ráðstefnunnar, sem jafnan hafa komið frá útlöndum. Herdís segir að á ráðstefnunni hafi hún ávallt upplifað mikla gleði og ákafa. „Umræðan hefur ekki snúist upp í þvarg, heldur er eldmóður í konunum. Ég held að þetta sé nokkuð sem einkennir kvennabaráttu þegar hún er í réttum farvegi. Þessi gleði og samstaða hefur haldist allt frá fyrstu ráðstefnunni,“ segir hún.
Konur hafi þörf fyrir að mynda með sér tengslanet, líkt og þekkt er að karlmenn gera sín á milli. Karlar hafi verið of lengi við völd og aðeins hleypt fáum konum að. „Karlar hafa hleypt einni og einni konu að og sú kona þá orðið einskonar tákngervingur fyrir að konur séu þátttakendur. Þá er hægt að benda á konuna einu og segja, jú, víst er kona í stjórn hjá okkur,“ segir Herdís.
Karlar með sinn reynsluheim
Staða kvenna í samfélaginu sýni þörfina fyrir að konur komi saman og ræði málin. Enn er langt í land með að konur njóti jafnra kjara og karlmenn. Konur komi almennt ekki að ákvörðunartökuferli í efstu lögum og það hafi áhrif. „Karlar nálgast hlutina út frá sínum reynsluheimi og hagsmunum. Þeir geta ekki talað fyrir okkur. Það verðum við að gera sjálfar,“ segir Herdís. Ákveðnum markmiðum jafnréttislaganna, t.d. þeim sem kveða á um samræmingu þátttöku á vinnumarkaði og fjölskylduábyrgðar, verði ekki náð nema konur eigi þar stærri hlut að máli en nú er. Ég held að konur séu orðnar langþreyttar á að hlutirnir gerist æ ofan í æ á forsendum karla. En það þýðir ekki að hagsmunir kynjanna séu endilega andstæðir.“Herdís segir að jafnréttisstarf sé mannréttindabarátta. „Mannréttindabarátta er ekki háð þeim tilgangi að tryggja eigin hag heldur til þess að skapa betra samfélag,“ segir hún og bætir við að konur megi ekki vera hræddar við að standa saman. „Konur óttast stundum að ef ein kona kemst að sé ekki pláss fyrir fleiri. Það er ekki langt síðan konur voru hræddar við að koma saman og ræða opinskátt um jafnrétti og kvenfrelsi. Þá var það skammaryrði að vera femínisti, en þetta hefur breyst,“ segir Herdís, sem sjálf átti þátt í stofnun Femínistafélags Íslands árið 2003.
En getur ráðstefna sem þessi haft áhrif? „Hún hefur þegar haft áhrif,“ segir Herdís og bendir á ályktanir sem Tengslanets-ráðstefnurnar hafi sent frá sér. Vísar hún m.a. til þess að lögum um hlutafélög hafi verið breytt í kjölfar ályktunar Tengslanets III um konur í stjórnir fyrirtækja. Þá komi fram í stjórnarsáttmála núverandi ríkisstjórnar að afnema beri launaleynd, en ályktun um þetta var samþykkt á Tengslaneti II árið 2005.
Í hnotskurn
» Ráðstefnan Tengslanet kvenna er nú haldin í fjórða sinn.
» Hún fer fram í Háskólanum á Bifröst.
» Yfirskrift ráðstefnunnar er konur og réttlæti.
» Stjórnandi og skipuleggjandi Tengslanetsins frá upphafi er dr. Herdís Þorgeirsdóttir prófessor.
https://www.mbl.is/greinasafn/grein/1217515/