by Herdís Þorgeirsdóttir | 19.07.2008 | ALMANAK
Rannsókn íslensk lagaprófessors kynnt æðstu dómurum Bandaríkjanna, eins og segir í fyrirsögn í Fréttablaðinu í dag, 19. júlí, á bls. 6. Það er Judith Resnik lagaprófessor á Yale sem kynnir niðurstöður rannsókna Herdísar Þorgeirsdóttur á ársfundi forseta hæstaréttar Bandaríkjanna og dómstjóra æðstu dómstóla landsins, í erindi sem hún flytur. “Það er mikill heiður að rannsókn íslensks fræðimanns sé kynnt með þessum hætti og fyrir þessum hópi”, segir Herdís í viðtali við Fréttablaðið í dag. Á myndinni er Judith Resnik.
by Herdís Þorgeirsdóttir | 7.07.2008 | ALMANAK
Áttunda árleg ráðstefna Evrópusamtaka kvenlögfræðinga var haldin í London dagana 4. – 5. júlí 2008. Margir áhugaverðir fyrirlesarar töluðu á ráðstefnunni, þ.á m. hvítklædda konan til vinstri á myndinni hér til hliðar. Hún er danskur þingmaður og heitir Hanne Severinesen. Hún var sérstakur ráðgjafi Juliu Timoshenko, forseta Úkraníu en Hanne sat á Evrópuráðsþinginu í Strassborg í 17 ár. Aðrir fyrirlesarar voru m.a. Maud de Boer Buquicchio, aðstoðarframkvæmdastjóri Evrópuráðsins, Lenia Samuel sem er annar yfirmanna vinnuréttarsviðs framkvæmdarstjórnar Evrópusambandsins og Diana Wallis varaforseti Evrópusambandsþingsins. Ráðstefnunni lauk með kvöldverði í bresku lávarðadeildinni, þar sem myndin að ofan er tekin. Cohen barónessa sat með okkur til borðs og flutti ræðu.
Íslenskir lögmenn sem sóttu ráðstefnuna voru Dögg Pálsdóttir hæstaréttarlögmaður, Margrét Gunnlaugsdóttir lögmaður í Hafnarfirði og Hjördís Harðardóttir lögmaður.
by Herdís Þorgeirsdóttir | 7.06.2008 | ALMANAK
Dr. Herdís Þorgeirsdóttir heldur framsöguerindi á ráðstefnu sem er haldin sameiginlega á vegum Evrópusambandsins og þings Evrópuráðsins til styrktar þjóðþingum. Ráðstefnan fjallar um aðgengi að upplýsingum og tengsl þjóðþinga við fjölmiðla og fer fram í þinginu í Montenegro föstudaginn 6. júní.
Erindi -Herdísar fjallar um upplýsingarétt og ber yfirskriftina: “The public´s right to know, the role of the media and impact of evolving European standards in Iceland as elsewhere”.
by Herdís Þorgeirsdóttir | 30.05.2008 | ALMANAK
Umfjöllun Viðskiptablaðsins um fjölmennsustu ráðstefnu sem haldin er í íslensku atvinnulífi:
Konur eiga langt í land þegar kemur að völdum og áhrifum í samfélaginu
Ráðstefnan Tengslanet IV – Völd til kvenna hófst í gær í Háskólanum á Bifröst. Þetta er í fjórða sinn sem ráðstefnan er haldin en yfirskrift hennar í ár er „Konur og réttlæti“.
Stofnandi hennar og stjórnandi frá upphafi er dr. Herdís Þorgeirsdóttir, prófessor við lagadeild Háskólans á Bifröst. Herdís segir hugmyndina í upphafi hafa verið að skapa nýja leið í jafnréttisbaráttunni. Tengslanetið sé vettvangur fyrir þverfaglega samvinnu kvenna af öllum sviðum samfélagsins og þar séu málin rædd opinskátt en um leið hafin yfir allt pólitískt dægurþras.
„Tengslanet er orðin stærsta ráðstefnan í íslensku viðskiptalífi. Hana sækja konur á öllum aldri. Á meðal þátttakenda eru konur úr viðskiptalífinu, lögfræðingar, kennarar, leikarar, bændur og húsmæður svo eitthvað sé nefnt.“
Fyrsta ráðstefnan gekk vonum framar
Herdís segir upphafið megi rekja til ársins 2004 en þá hafði hún nýhafið störf við lagadeild Háskólans á Bifröst. Í fyrstu gekk hugmyndin út á að halda ráðstefnu fyrir kvenlögfræðinga en fljótlega varð henni ljóst að sá hópur væri of þröngt afmarkaður. Það væri líklegri leið til árangurs að hafa víðtækari skírskotun og höfða til fleiri. Á sama tíma voru stofnuð félög kvenna í ýmsum starfsstéttum, s.s. í lögmennsku, endurskoðun og hjá læknum. Herdís segist því hafa látið þau boð út ganga að ráðstefnan væri öllum opin. Fljótlega varð henni ljóst að áhuginn væri mikill því það rigndi inn skráningu í tölvupósti. Nadine Strossen, forseti bandarísku réttindasamtakanna, sem er jafnframt þekktur prófessor við lagadeild New York háskólans í Bandaríkjunum hélt erindi á fyrstu ráðstefnunni ásamt fjölda íslenskra fyrirlesara.
Mikil stemning myndaðist strax á fyrsta degi Ráðstefnan þótti takast vel og var Herdís m.a. útnefnd til verðlauna Jafnréttisráðs fyrir vikið.
„Það myndaðist svo mikil stemning á ráðstefnunni. Þarna voru konur sem voru t.d. höfuðandstæðingar úr stjórnmálum en þetta hófst einhvern veginn yfir alla flokkadrætti. Konur sameinuðust í einhverjum ákafa og gleði. Það sem m.a. hefur einkennt þessar ráðstefnur er einmitt ekkert þras, heldur miklu frekar ákveðin gleði og samstaða. Konur virðast líta á hana sem samræðugrundvöll.“
Hér má sjá dagskrá einnar fjölmennustu ráðstefnu sem haldin hefur verið í íslensku fræðasamfélagi.
Umfjöllun Viðskiptablaðsins.
Meðfylgjandi mynd tók ljósmyndarinn Ari Magg fyrir auglýsingu vegna Tengslanets-IV ráðstefnunnar.
by Herdís Þorgeirsdóttir | 29.05.2008 | ALMANAK
TENGSLANET IV – Völd til kvenna
- – 30. maí, 2008
„KONUR & RÉTTLÆTI“
- mars, 2008
Ágæta Tengslanet,
Þakka ykkur kærlega fyrir síðast og fyrir ykkar þátt í því að gera ráðstefnuna Tengslanet III – Völd til kvenna – að fjölmennustu ráðstefnu í íslensku viðskiptalífi árið 2006. Auðvitað átti hin heimsþekkta Germaine Greer sinn þátt í því hve aðsóknin var mikil. Það er þó fyrir ykkar tilstuðlan, sem hafið sótt tengslanets-ráðstefnurnar að þær eru vinsælustu ráðstefnur um málefni kvenna sem haldnar hafa verið á Íslandi frá upphafi. Við höfum með okkar framlagi á tengslanets-ráðstefnunum, sem sóttar eru af konum úr öllu litrófi stjórnmála og starfsstétta, haft umtalsverð áhrif á jafnréttisbaráttu á Íslandi.
Tengslanet IV – Völd til kvenna verður haldin 29. – 30. maí n.k. og er yfirskrift ráðstefnunnar KONUR & RÉTTLÆTI. Ráðstefnan verður með svipuðu sniði og áður: Mæting á Bifröst kl. 16 fimmtudaginn 29. maí,gengið á Grábrók eftir upphitun við rætur fjallsins; fjallræða á toppnum, stórkostleg veisla úti í guðsgrænni náttúrunni í Paradísarlaut á fimmtudagskvöldinu; röð af frábærum fyrirlestrum á föstudeginum og móttakaforseta Íslands á Bessastöðum í lok ráðstefnu.
Að venju heiðra ráðstefnuna stjörnufyrirlesarar. Judith Resnik prófessor við lagadeildina á Yale sem var útnefnd fremsti fræðimaður í lögfræði 2008 af bandarísku lögmannasamtökunum hefur vakið athygli fyrir rannsóknir sínar bæði í Bandaríkjunum og Evrópu. Hún er af mörgum talin verða næsta konan sem sest í Hæstarétt Bandaríkjanna. Sjá meðfylgjandi mynd og ferilskrá. Maud de Boer-Buquicchio er annar framkvæmdastjóri Evrópuráðsins og eftirsóttur fyrirlesari innan lögsögu þess sem rúmar 800 milljónir manna. Hún er glæsilegur fyrirlesari og með púlsinn á stöðu mannréttinda í Evrópu og með yfirsýn á réttarstöðu kvenna í ríkjum sambandsins en alls eru þau 46 og hefur hún heimsótt þau vel flest (http://www.coe.int/t/secretarygeneral/sga/Biography_en.asp). Sjá meðfylgjandi mynd.
Að vanda verður einnig fjöldi íslenskra, skemmtilegra fyrirlesara og umræður í kjölfarið. Dagskrá verður send út bráðlega. Að vanda er þátttökugjaldi haldið í algeru lágmarki. Verð fyrir þátttöku á ráðstefnunni þar sem allt er innifalið (nema gisting), þ.e. matur, drykkur og akstur eftir veislu og aftur á ráðstefnuna daginn eftir er kr. 16.500.
Með þessu bréfi viljum við benda ykkur á að gestir tengslanetsins verða sjálfir að panta gistiaðstöðu á eftirtöldum þremur hótelum í nágrenni Bifrastar og munum við sjá um að aka gestum á hótel eftir veisluna í Paradísarlaut og sækja aftur að morgni föstudagsins 1. júní. Ráðstefnan verður haldin í Hriflu, hinum glæsilega ráðstefnusal á Bifröst eins og fyrri ár. Á Bifröst verður einnig snæddur hádegisverður á veröndinni fyrir framan kaffihúsið ef vel viðrar.
Ég hef skynjað mikinn áhuga á tengslanetinu hjá konum í ýmsum fagfélögum, sem hafa komið að tengslanetinu áður; félagi kvenna í lögmennsku, í læknastétt, meðal verkfræðinga, endurskoðenda, félagi kvenna í atvinnurekstri, konum úr listalífi, starfsmönnum borgar og bæja, konum í pólitík og konum sem ég hef hitt í heita pottinum í lauginni eða á förnum vegi; konum á öllum aldri og alls staðar af landinu.
SKRÁNING fer fram á heimasíðu skólans www.bifrost.is. Aðstoðarkona mín Sonja Ýr Þorbergsdóttirmeistaranemi við lagadeildina á Bifröst svarar fyrirspurnum varðandi skráningar en netfang hennar ersonjat@bifrost.is og gsm 661 2930.
Ég hvet ykkur til að panta ykkur gistiaðstöðu sem fyrst – eftirtalin hótel bjóða vetrarverð fyrir tveggja manna herbergi.
Kær kveðja,
Herdís Þorgeirsdóttir
GESTUM ER BENT Á AÐ PANTA HÓTEL Í TÍMA (sjá upplýsingar hér fyrir neðan)
Boðið er upp á gistingu á hótelum í nágrenni Bifrastar. Valið stendur á milli Hraunsnefs sem er lítið og vinalegt sveitahótel staðsett rétt hjá Bifröst; Hótel Reykholts; Hótel Hamars sem er nýtt Icelandair hótel og stendur á milli Bifrastar og Borgarness. Afsláttur er fyrir þátttakendur Tengslanets IV.
SKRÁNING fer fram á heimasíðu skólans www.bifrost.is. Aðstoðarkona mín Sonja Ýr Þorbergsdóttir,meistaranemi við lagadeildina á Bifröst, svarar fyrirspurnum varðandi skráningar en netfang hennar ersonjat@bifrost.is og gsm 661 2930.
- Hótel Hamar verð með 15% afslætti:
2ja manna herbergi með morgunverði: 12.600
Pantanir í síma : 433-6600 eða e-mail: hamar@icehotels.is
http://icehotels.is/
- Hraunsnef verð með 18% afslætti:
2ja manna herbergi með morgunverði: 9.500
Pantanir í síma: 435-0111 eða e-mail: hraunsnef@hraunsnef.is
http://hraunsnef.is/
- Hótel Reykholt verð með 25 % afslætti:
1 manns herbergi með morgunverði: 12.675
2ja manna herbergi með morgunverði: 15.675
3ja manna herbergi með morgunverði: 18.600
Pantanir í síma: 435-1260 eða e-mail: bokun@Fosshotel.is
http://www.fosshotel.is/en/hotel/fosshotel_reykholt.html
Ráðstefnugestum verður ekið á hótelin á fimmtudagskvöld eftir kvöldverðarveisluna í Paradísarlaut og þeir sóttir aftur eftir morgunverð á föstudagsmorgni til að sitja ráðstefnuna á Bifröst.
