Talaði fyrir áliti Feneyjanefndar rétt í þessu um áhrif neyðarlaga á frelsi fjölmiðla í Tyrklandi. Ástandið er mjög alvarlegt, 190 sjónvarpstöðvum og fjölmiðlafyrirtækjum hefur verið lokað fyrirvaralaust á grundvelli neyðarlaganna sem sett voru í kjölfar misheppnaðs valdaráns í júlí 2016. Um 2500 blaðamenn hafa misst vinnuna; margir fangelsaðir ásakaðir um tengsl við hryðjuverkasamtök. Stór fjölmiðlafyrirtæki hafa verið keypt upp af fjársterkum aðilum með sterk tengsl við stjórnvöld. Nýsett neyðarlög aflétta hlutleysisreglunni af sjónvarpi svo unnt sé að stunda áróður í aðdraganda þjóðaratkvæðagreiðslu um breytingar á stjórnarskránni, hinn 16. apríl n.k. Segja má að lýðræðislegum stjórnarháttum hafi verið vikið til hliðar í aðdraganda kosninga sem geta gerbylt tyrknesku stjórnkerfi og afnumið lýðræði og réttarríki til frambúðar. Tyrknesk stjórnvöld voru viðstödd fundinn en álitið var samþykkt einróma.
Frétt stærsta dagblaðs Tyrklands um heimsókn Feneyjanefndar til Ankara fyrir mánuði:
http://www.aktuelintermedya.com.tr/venedik-avrupa-hukuk-yoluyla-demokrasi-komisyonunun-yargitayi-ziyareti/
