by Herdís Þorgeirsdóttir | 26.05.2012 | Almanak, Mannréttindi & pólitík
Vigdís Grímsdóttir rithöfundur um skipulagðan róg
Sumir sögðu við suma að sumum hefði ekki líkað við framgöngu Herdísar í menntaskóla: sumum þótti hún þá heldur fín. Sumir svöruðu því til að þeir skildu suma mætavel því sumir hefðu heldur alls ekki þolað Herdísi þegar hún var ritstjóri og vildi sem slíkur stjórna sumum sem vildu alls ekki láta stjórna sér. Sumir lögðu þá orð í belg og sögðu að sumir hefðu heyrt til Herdísar í
sjoppu og fundist hún hrokafull og það þegar hún var ólétt hérna í denn. Þetta segja sumir og sumir hafa auðvitað alltaf rétt fyrir sér því þannig eru sumir og hafa alltaf verið.
Kristján Hreinsson skáld: Engin uppgjöf!
Auðvitað segja flestir að það kalli á uppgjöf þegar fylgið er lítið. Þetta er samt ekki svo einfalt; ef allir þeir sem hafa ákveðið að kjósa Herdísi – vegna þess að hún er besti kosturinn – fá með sér einn vin, henni til stuðnings, þá hefur okkur tekist að tvöfalda fylgið.
Að ganga á fjöll er góður siðir, einsog ágæt kona á æskuslóðum mínum orðaði það. Hún lét karlinn aka sér útfyrir borgarmörkin og svo eyddi hún deginum við klifur. Brattar hlíðar og hættulegar skriður voru henni engin fyrirstaða. Hún kleif öll fjöll sem eitthvað var varið í að klífa.
Einhverju sinni var hún spurð útí þetta príl, einsog önnur nágrannakona orðaði það. Svarið var afar einfalt: -Ég gæti svosem gengið á Öskjuhlíðina um hverja helgi. En lágreist fjöll gefa mér akkúrat ekkert. Það eru háu og illfæru fjöllin sem gefa lífinu gildi. Og uppgjöf er ekki til.
Sjálfur hef ég látið þessar pælingar vakna á milli eyna minna annað veifið.
-ÁFRAM HERDÍS!
Vigdís Grímsdóttir rithöfundur: Valdablokkir á bak við framboðin (“turnana” tvo)
Mér liggur þetta á hjarta hérna í rokinu á Ströndum:
Við skulum hætta að tala um tvo turna því þetta eru tvær öflugar valdablokkir; annars vegar Framsóknar- og Sjálfstæðisflokkur á bak við Ólaf Ragnar og hins vegar Samfylking með nýjasta bandamanni sínum Besta flokki og Bjartri framtíð ásamt þeim hópi úr Sjálfstæðisflokki sem á sér drauma um fyrirhruns-samsteypu Samfylkingar og Sjálfstæðisflokks.
Enn eina ferðina er þjóðin fórnarlamb skoðanamótunar þessara valdablokka, sem stjórna umræðunni í gegnum fjölmiðla sína. Þjóðin heldur að hún sé að kjósa á milli tveggja einstaklinga í formi turna en hún er að koma sér fyrir í lestum þeirra klíkna sem stjórna ferðinni og fara með hana þangað sem þeim hentar ásamt þeim forseta sem þeim hentar.
by Herdís Þorgeirsdóttir | 23.05.2012 | Mannréttindi & pólitík
Herdís Þorgeirsdóttir forsetaframbjóðandi verður á Beinni línu á DV.is á morgun. Hún svarar spurningum lesenda frá klukkan 14.00. Herdís var fyrsta konan til að bjóða sig fram til embættisins í ár en mikið hefur var rætt um hana sem mögulegan frambjóðanda í umræðum á samskiptasíðunni Facebook í aðdraganda framboðsins.
Herdís er 58 ára og er með doktorsgráðu í lögum, með lögmannsréttindi og stjórnmálafræðingur. Hún var skipuð prófessor við Háskólann á Bifröst árið 2004. Hún er einnig einn af eigendum Víkur Lögmannsstofu. Í júlí árið 2009 var Herdís kjörin forseti Evrópusamtaka kvenlögfræðinga og var hún endurkjörin árið 2011. Hún hefur bæði starfað fyrir Evrópuráðið á sviði mannréttinda og í lögfræðingateymi fyrir Evrópusambandið á sviði vinnuréttar og jafnréttismála.
Bein lína var um árabil þekkt fyrirbæri á vegum DV. Þá gátu lesendur hringt inn og borið spurningu fyrir ráðamenn eða aðra þekkta einstaklinga sem í deiglunni voru hverju sinni. Með Beinni línu á DV.is er markmiðið að færa þá hugmynd til nútímans. DV hvetur lesendur til að sýna kurteisi í orðavali og spyrja hnitmiðaðra spurninga.
by Herdís Þorgeirsdóttir | 20.05.2012 | Mannréttindi & pólitík
Innlent | mbl | 20.5.2012 | 10:49 | Uppfært 12:57
Herdís Þorgeirsdóttir forsetaframbjóðandi segist fjarri því að gefast upp þótt skoðanakannanir bendi til að hún njóti lítils fylgis. Herdís var gestur Sigurjóns M. Egilssonar í Sprengisandi í morgun og sagði m.a. að hún teldi tíma Ólafs Ragnars liðinn, 20 ár séu allt of langur tími í embætti.
„Fjarri því,” sagði Herdís þegar Sigurjón spurði hana hvort niðurstöður skoðanakannanna hefðu ekki áhrif á hana. Hún sagðist hafa lesið í Njálu í gærkvöldi og hugsað til þess „að hetjurnar í Njálu eru þær sem eru lagðar í einelti og jafnvel drepnar í lokin, ekki sigurvegararnir. Og ég held ótrauð áfram.” Herdís sagði jafnframt að skoðanakannanir væru ekki fyllilega marktækar. Búið væri að stilla upp tveimur turnum eins og einu valkostunum, en margir ættu eftir að gera upp hug sinn.
Ríkisútvarpið ekki hlutlaust
Herdís gagnrýndi jafnframt umfjöllun fjölmiðla um forsetaslaginn, ekki síst Rúv. Lýsti hún þeirri skoðun sinni að Páll Magnússon útvarpsstjóri hefði átt að taka Þóru Arnórsdóttur af skjánum strax í janúar þegar hún var fyrst nefnd sem hugsanlegur frambjóðandi. „Við erum ósátt [við framgöngu Rúv]. Þetta er spurning um hvort ríkisútvarpið virðist vera hlutlaust og okkur finnst að það sé ekki,” sagði Herdís. „Ég tel að þetta sé mjög alvarlegt mál, vegna þess að fjölmiðlar gegna lykilhlutverki í kosningum.”
Herdís sagði að enn ættu eftir að eiga sér stað umræður um afstöðu frambjóðenda til málefnanna. „Önnur málefni hafa borið hæst, málefni einkalífsins […] Því miður er dagskrá ríkisútvarpsins ekki þannig að það verði miklar umræður, ekki eins miklar og ég hefði viljað að færu fram til að fólk geti gert upp hug sinn.”
Fjögur kjörtímabil nóg
Aðspurð um málskotsrétt forseta og hvernig Ólafur Ragnar Grímsson hefur beitt honum í sinni forsetatíð sagði Herdís að hún hefði sjálf beitt honum til þess að vísa fyrri Icesave samningnum í þjóðaratkvæðagreiðslu, eins og Ólafur Ragnar gerði. Með Icesave tvö og fjölmiðlafrumvarpið hefði hún verið í meiri vafa, sagði hún. „En ég skil að hann hafi gert það, enda finnst mér að lýðræði sé alltaf svarið og ég sé ekki að það sé stórhættulegt að vísa málum til þjóðarinnar því hennar er valdið.”
Herdís sagðist bera virðingu fyrir Ólafi Ragnari, hann væri gamli prófessorinn hennar. „En hans tími er að mínu mati kominn. Hann er búinn að vera fjögur kjörtímabil, og 20 ár eru allt of langur tími.“
by Herdís Þorgeirsdóttir | 17.05.2012 | Mannréttindi & pólitík
Frétt Stöðvar 2: viðtal við Herdísi Þorgeirsdóttur
Fréttamenn Ríkisútvarps ætla ekki að víkja
Bréf til Sigríðar Hagalín Björnsdóttur hjá Ríkisútvarpinu dagsett 9. maí, 2012
Í framhaldi af símtali þínu við Herdísi Þorgeirsdóttur forsetaframbjóðanda í dag hefur Herdís falið mér að koma eftirfarandi á framfæri vegna þeirrar staðreyndar að einn frambjóðenda til embættis forseta Íslands er einstaklingur sem fram til 4. apríl sl. var nánast daglegur gestur á heimilum landsmanna vegna starfa sinna hjá Ríkisútvarpinu sem aðstoðarritstjóri í fréttaþættinum Kastljósi og annar tveggja spyrla í spurningaþættinum Útsvari:
- Hinn 5. janúar 2012 birtist á pressan.is viðtal við umræddan forsetaframbjóðanda, sjá http://www.pressan.is/frettir/lesafrett/thora-arnors-heit-fyrir-forsetaframbodi—fjoldi-askorana—get-ekki-annad-en-brugdist-vid-af-fullri-virdingu þar sem fram kemur að hún útilokar ekki forsetaframboð og að hún geti ekki annað en brugðist við af fullri virðingu fyrir þeim sem skorað hafi á sig. Í viðtalinu kemur fram að á starfsmanninum sé að skilja að forsetaframboð sé meira en líklegt.
- Þrátt fyrir þessa frétt á víðlesnum netmiðli verður ekki séð að Ríkisútvarpið hafi gripið til ráðstafana gagnvart áframhaldandi störfum umrædds einstaklings á skjánum. Viðkomandi hélt áfram að koma fram í viku hverri í Kastljósi og Útsvari.
- Umræddur starfsmaður Ríkisútvarpsins lýsti yfir framboði til embættis forseta Íslans 4. apríl sl. Í frétt Ríkisútvarpsins um framboðið segir ekkert um hvenær hún lét af störfum hjá Ríkisútvarpinu en fram kemur að sambýlismaður hennar, sem einnig starfar hjá Ríkisútvarpinu, hafi fengið leyfi frá störfum frá og með þeim degi, sjá: http://www.ruv.is/frett/thora-bydur-sig-fram-til-forseta. Við gerð þessa tölvupósts skoðaði ég heimasíðu Ríkisútvarpsins. Bæði frambjóðandinn og sambýlismaðurinn eru enn á lista stofnunarinnar yfir starfsmenn og hvergi tilgreint að þau séu í leyfi.
- Það vekur furðu að Ríkisútvarpið virðist engar reglur hafa um það hvað gildir í tilvikum sem þessum. Í þrjá mánuði var umræddur starfsmaður áfram oft í viku gestur á skjám landsmanna þrátt fyrir yfirlýsinguna um að forsetaframboð væri líklegt. Starfsmaðurinn gaf þann möguleika aldrei frá sér eftir að frétt um efnið birtist hinn 5. janúar sl.
- Í byrjun maí sl., mánuði eftir að viðkomandi lýsti yfir forsetaframboði, sendi fréttastjóri Ríkisútvarpsins bréf til starfsmanna og hvatti þá til hlutleysis í umfjöllun í komandi forsetaframboði.
Ríkisútvarpið er útvarp allra landsmanna. Vegna þessarar stöðu á Ríkisútvarpið ekki eingöngu að vera hlutlaust heldur virðast hlutlaust. Framangreindar staðreyndir eru mikið umhugsunarefni og þær gera fátt til að vekja traust á því að Ríkisútvarpið sé eða geti verið hlutlaust í umfjöllun sinni um frambjóðendur í komandi forsetakosningum.
Sú skekkja sem framangreint hefur valdið hlýtur að kalla á að Ríkisútvarpið geri það sem í þess valdi stendur til að leiðrétta ójafna stöðu frambjóðenda. Þá hlýtur Ríkisútvarpið að þurfa að tryggja það að engir samstarfsmenn umrædds frambjóðanda komi nálægt þáttagerð vegna forsetakosninga. Til þess eru þeir vanhæfir. Aðrir forsetaframbjóðendur geta ekki treyst því að þeir njóti hlutleysis eða sanngjarnrar umfjöllunar í þeirri kosningaumfjöllun sem framundan er nema að þeirri vinnu komi af hálfu Ríkisútvarpsins aðrir en samstarfsmenn eins forsetaframbjóðandans.
Þess er óskað að Ríkisútvarpið upplýsi:
- Hvernig Ríkisútvarpið hyggst kynna aðra forsetaframbjóðendur til að gera það sem hægt er að tryggja það að þeir sitji við sama borð og starfsmaður Ríkisútvarpsins, sem var að störfum á skjánum nánast fram að þeim degi sem framboði var lýst.
- Hvernig Ríkisútvarpið hyggst tryggja hlutlausa kosningaumfjöllun og hvaða utanaðkomandi einstaklingar hafi verið fengnir til þess verks að annast hana af hálfu þess.
Um leið og óskað er staðfestingar á móttöku þessa tölvupósts er þess farið á leit að viðbrögð RÚV við ofangreindu berist svo fljótt sem auðið er.
Með virðingu,
f.h. framboðs Herdísar Þorgeirsdóttur til embættis forseta Íslands,
![NÆRMYND AF HERDÍSI ÞORGEIRSDÓTTUR]()
by Herdís Þorgeirsdóttir | 15.05.2012 | Mannréttindi & pólitík
Viðtöl við vini Herdísar og systur um æsku hennar uppvöxt, feril og persónu í Íslandi í dag á Stöð 2, 15. maí 2012. Umsjón Sigrún Ósk Kristjánsdóttir og Sindri Sindrason.
Þessu góða fólki eru færðar þakkir fyrir framlag þeirra og fagleg vinnubrögð.
Elísabet Ronaldsdóttir
“Herdís hefur skýra sýn á hlutverk forseta Íslands, hugmyndafræði hennar öll er mörkuð af störfum hennar í þágu mannréttindamála og tjáningarfrelsis og hún er fyrir hugmyndir um sjálfbærni. Get ekki hugsað mér betri forseta. Áfram Herdís!”
– Elísabet Ronaldsdóttir á FB 17. maí, 2012
Herdís Magnea Hübner
“Ef þið eruð í vafa um hver sé hæfasti forsetaframbjóðandinn, skuluð þið horfa á þessa nærmynd. Hugsið svo um hvort það sé boðlegt að láta telja sér trú um að það séu bara tveir möguleikar í boði”.
– Herdís Magnea Hübner á FB 15. maí, 2012.
“Það er ekkert auðveldara í veröldinni en að styðja heiðarlega hugsjónamanneskju með sterka réttlætiskennd; manneskju sem hefur skömm á mismunun í samfélaginu, berst fyrir mannréttindum, jafnrétti og bræðralagi og lætur hvorki hinn dauðþreytta fjórflokk né hin ísmeygilegu peningaöfl gengisfella sannfæringu sína. Herdís er traustsins verð, hún kemur til dyranna einsog hún er klædd og segir það sem henni býr í brjósti.”
(Úr ummælakerfi):
Vigdís Grímsdóttir · Works at Rithöfundur/kennari
Það var einhver sem sendi mér póst og spurði hvort það væri eitthvað sérstakt að ég styddi
Herdís Þorgeirsdóttir ( þgf) – svarið er já – það er sérstakt, ég styð ekki fólk nema það hljómi við þá sannfæringu mína að allir menn séu jafnir og eigi sama rétt, að öllu fólki sé gert jafnt undir höfði, slíkar manneskjur eru fágætar, Herdís Þorgeirsdóttir, er ein þeirra!
by Herdís Þorgeirsdóttir | 15.05.2012 | Mannréttindi & pólitík
Tilkynning frá framboði Herdísar Þorgeirsdóttur
herdis.is 11:00 15. maí, 2012
Söfnun meðmælenda er lokið.
Stuðningsmenn Herdísar Þorgeirsdóttur eru að ganga frá gögnum í því formi sem yfirkjörstjórnir óska eftir.
Söfnun um land allt gekk mjög vel. Þeim sem söfnuðu undirskriftum eru færðar einlægar þakkir.
Öllum sem voru tilbúnir að mæla með framboði Herdísar Þorgeirsdóttur til embættis forseta Íslands færir Herdís sérstakar þakkir.
