Um Herdísi

Um Herdísi

headshotDr. juris Herdís Þorgeirsdóttir er lögmaður í Reykjavík. Hún hefur víðtæka reynslu úr akademíu og atvinnulífi, starfar bæði hér og á alþjóðavettvangi. Hún var skipuð prófessor við lagadeild háskólans á Bifröst 2004 og hefur einnig kennt við háskóla erlendis.

Herdís er höfundur bóka og greina, sem hafa birst alþjóðlega.  Hún hefur mikla reynslu af alþjóðlegu samstarfi; er varaforseti Feneyjanefndar Evrópuráðsins (kjörin 2013) og endurkjörin 2015. Hún veitti áður forstöðu stærstu undirnefnd Feneyjanefndarinnar um mannréttindi; á sæti í vísindaráði Feneyjanefndar og var jafnframt skipuð jafnréttisfulltrúi Feneyjanefndar í október 2014. Hún var kjörin forseti  Evrópusamtaka kvenlögfræðinga (European Women Lawyers’ Association /EWLA) 2009 og endurkjörin 2011. Herdís tók sæti í stjórn Evrópsku lagaakademíunnar (European Academy of Law /ERA) í Trier 2012. Hún hefur starfað í teymi evrópskra lögfræðinga á grundvelli evrópsks vinnuréttar og jafnréttis frá 2003. Hún hefur tekið mikinn þátt í öflugu mannréttindastarfi Evrópuráðsins um árabil, kennt við erlenda háskóla og haldið fyrirlestra víða um heim.

Á meðan hún gegndi stöðu prófessors við lagadeild háskólans á Bifröst var hún jafnframt hugmyndasmiður, stofnandi og skipuleggjandi hinna árlegu tengslanets-ráðstefna, sem voru fjölsóttustu ráðstefnur sem haldnar voru hér á landi um árabil.

Herdís rak eigið útgáfufyrirtæki í tæpan áratug og var frumkvöðull á sviði tímaritaútgáfu. Hún var fyrsti ritstjóri tímaritsins Mannlífs frá 1984 til 1986 en þá stofnaði hún eigið útgáfufyrirtæki Ófeig hf., sem gaf út tímaritið Heimsmynd til ársins 1994. Áður hafði hún starfað sem blaðamaður á Morgunblaðinu frá 1976-1980.

Herdís er  með doktorspróf frá lagadeild háskólans í Lundi (Dr. Jur.), með M.A.L.D prófi í þjóðarétti og alþjóðastjórnmálum frá Fletcher School of Law and Diplomacy í Boston, auk þess sem hún er með próf í lögfræði og stjórnmálafræði. Hún var gestafræðimaður við Oxford-háskóla 1999. Hún lagði stund á nám í blaðamennsku á Fleet Street í London í einn vetur og var í námi í sálfræði við háskólann í Aix-en-Provence  veturinn eftir stúdentspróf. Hún öðlaðist réttindi til að starfa sem héraðsdómslögmaður 2011. Hún og Dögg Pálsdóttir  hæstaréttarlögmaður eru í samstarfi og sinna allri almennri lögfræðiþjónustu.

Sorry, comments are closed for this post.