Á meðfylgjandi mynd eru nýkjörnir varaforsetar ásamt forsetanum Gianni Buquicchio, talið f.v. Christopher Grabenwarter dómari við stjórnlagadómstól Austurríkis, Hanna Suchocka lagaprófessor og fyrrum forsætisráðherra Póllands, Gianni Buquicchio forseti nefndarinnar frá 2009 og Herdís Þorgeirsdóttir.
Dr. Herdís Þorgeirsdóttir var endurkjörin varaforseti nefndar Evrópuráðsins um lýðræði með lögum, betur þekkt sem Feneyjanefndin, hinn 20. desember s.l. og var hún sú eina af þremur varaforsetum kjörnum í síðustu kosningum 2013 sem hlaut endurkjör.
Feneyjanefndin nýtur mikillar virðingar á alþjóðavettvangi en hún er ráðgefandi aðili Evrópuráðsins um stjórnskipuleg málefni og gætir áhrifa hennar gæti langt út fyrir raðir Evrópuráðsins. Hlutverk Feneyjanefndar er að ráðleggja aðildarríkjum og aðstoða þau við að aðlaga löggjöf og stofnanir til samræmis við evrópsk og alþjóðleg viðmið á sviði lýðræðis, mannréttinda og réttarríkis. Mannréttindadómstóll Evrópu hefur vitnað til álita Feneyjanefndar í tugum dómsmála undanfarin ár.
Aðild að Feneyjanefnd eiga 60 ríki, þar af öll 47 aðildarríki Evrópuráðsins auk Bandaríkjanna, Brasilíu, Chile, Perú, Mexíkó, Ísraels, Suður-Kóreu, Alsírs, Marokkó, Túnis og nokkurra ríkja í mið-Asíu. Fimm ríki eiga óformlega aðild að Feneyjanefnd, þ.á m. Kanada og Suður-Afríka. Framkvæmdastjórn Evrópuráðsins og Efnahags, öryggis og samvinnustofnun Evrópu taka þátt í aðalfundum nefndarinnar, sem haldnir eru ársfjórðunglega í Feneyjum.
Í nefndinni eiga sæti lögfræðingar skipaðir af aðildarríkjum en sem starfa sjálfstætt og óháð þeim. Forseti nefndarinnar er Ítalinn Gianni Buquicchio sem hefur verið forseti frá 2009. Herdís var skipuð aðalfulltrúi Íslands í Feneyjanefnd 2010 og hefur gegnt mikilvægum störfum fyrir nefndina síðan bæði sem sérfræðingur á sviði mannréttinda og stjórnskipunar og undanfarin ár sem varaforseti í samskiptum við aðildarríkin. Hún er doktor í lögum frá lagadeild háskólans í Lundi og með M.A.L.D. gráðu í þjóðarétti og alþjóðastjórnmálum frá Fletcher School of Law í Boston. Hún er í hópi þekktra fræðimanna alþjóðlega á sviði tjáningarfrelsis. Herdís var skipuð prófessor við lagadeild háskólans á Bifröst 2004 en starfar nú sem lögmaður. Hún hefur verið kjörin til fleiri trúnaðarstarfa alþjóðlega; var í tvígang kjörin forseti Evrópusamtaka kvenlögfræðinga og er í stjórn evrópsku lagaakademíunnar frá 2012.
Sjá frétt á heimasíðu Evrópuráðsins og utanríkisráðuneytisins og á visir.is.
(Á meðfylgjandi mynd eru nýkjörnir varaforsetar ásamt forsetanum Gianni Buquicchio, talið f.v. Christopher Grabenwarter dómari við stjórnlagadómstól Austurríkis, Hanna Suchocka lagaprófessor og fyrrum forsætisráðherra Póllands, Gianni Buquicchio forseti nefndarinnar frá 2009 og Herdís Þorgeirsdóttir.)
Ásamt -Roberto de Figueiredo Caldas forseta milliríkjadómstóls Ameríkuríkja á sviði mannréttinda (Inter-American Court of Human Rights) sem er með aðsetur í Costa Rica. Sjálfur er hann frá Brasilíu þar sem hann var lögmaður.
